الدنيا لسه بخير

...الدنيا لسه بخير...

الدنيا لسه بخير

لما ننام على دمعة

ونصحى على دمعة

ولا حد حاسس بيك

غير مخدة

وعلبة مناديلك

شوية أماني

سجادة صلاة

الليل اللي شهد

على جرح سنينك

…………………….

الدنيا لسه بخير

لما تعيش فقير

مش لاقي لقمة

تصبر جوعك

وصوت ضميرك

يبكي

ينادي

في ظلمة

مكان

وظلم البشر

أوعى تخون

وتبيع

نفسك

مبادئك

أرضك

وطنك

شقى سنينك

…………………….

الدنيا لسه بخير

لما تكون كمبارس

تفدي البطل

مسرح هزيل

كراسي إمتلت

شياطين

يقولوا عنهم بشر

عرائس المولد

تحركها ادين

يمين يمين

شمال شمال

ناس بتضحك

ناس بتبكي

ناس نايمة

ناس صاحية

ناس فاهمة

ناس مش فاهمة

ناس فوق

ناس تحت

ناس خافت

ناس جريت

ناس عرفت النهاية

من البداية

الي اتفرش لها الحرير

كلام في ورق

لمعته ذهب

والواقع مرير

كنا وكان

قصة حياة

انكتب عنها كتب

الحقيقة

مسرحية

اتسرق فيها

حلم الغلابا

وناس تبيعه

لإهل الخير

……………………

لسه الدنيا بخير

طول ماأنا

وأنت

هي

وهما

ساكتين عن الحق

لأن الحق

أصبح رخيص

ثمنه منصب

كرسي

وكلمة أمير

اصحى يانايم

دا لوكان عندك ضمير

دلال راضي